MKOA WA SHINYANGA KUJIPANGA KWA UCHAGUZI MKUU 2025: INEC YAENDELEA KUTOA MAFUNZO YA UANDIKISHAJI

Makamu Mwenyekiti wa Tume Huru ya Taifa ya Uchaguzi, Mhe. Jaji wa Rufaa (Mstaafu), Mbarouk Salim Mbarouk akizungumza wakati akifungua mafunzo ya Uboreshaji wa Daftari la Kudumu la Wapiga Kura kwa Mratibu wa Uandikishaji Mkoa wa Shinyanga, Maafisa waandikishaji, Maafisa Waandikishaji Wasaidizi ngazi ya Jimbo, Maafisa Uchaguzi, Maafisa Ugavi na Maafisa TEHAMA wa Halmashauri za Mkoa wa Shinyanga leo Jumamosi Agosti 10,2024.

Na Mapuli Kitina Misalaba

Tume Huru ya Taifa ya Uchaguzi (INEC) imeendelea na mafunzo maalum kwa ajili ya Uboreshaji wa Daftari la Kudumu la Wapiga Kura katika Mkoa wa Shinyanga.

Mafunzo hayo kwa siku ya leo Agosti 10, 2024 yamewahusisha Mratibu wa Uandikishaji wa Mkoa, Maafisa waandikishaji, Maafisa Waandikishaji Wasaidizi ngazi ya Jimbo, Maafisa Uchaguzi, Maafisa Ugavi, na Maafisa TEHAMA wa Halmashauri za Mkoa wa Shinyanga.

Akizungumza katika Mafunzo hayo Makamu Mwenyekiti wa Tume Huru ya Taifa ya Uchaguzi, Mhe. Jaji wa Rufaa (Mstaafu) Mbarouk Salim Mbarouk amewataka washiriki wa mafunzo hayo kuhakikisha wanaelewa kwa kina ujazaji wa fomu na matumizi ya mfumo wa kuandikisha wapiga kura (Voters Registration System – VRS), ili waweze kutekeleza majukumu yao kwa ufasaha na kwa usahihi wakati wa zoezi la uboreshaji wa daftari.

"Kuteuliwa kwenu kunatokana na ujuzi, uwezo, na weledi mlionao katika kutekeleza majukumu ya kitaifa, ikiwa ni maandalizi ya uchaguzi mkuu wa mwaka 2025,"

"Ni matarajio ya Tume kuwa mafunzo haya yatawajengea umahiri wa kutosha kutekeleza majukumu yenu na kufanikisha zoezi hili muhimu." amesema Mhe. Jaji Mbarouk.

Mhe. Jaji Mbarouk pia amesisitiza umuhimu wa ushirikiano kati ya watendaji wote wa uboreshaji, serikali, vyama vya siasa, na wadau wengine wa uchaguzi."Matokeo bora ya zoezi hili yanategemea ushirikiano mkubwa kati ya wadau wote," ameongeza.

Aidha, amebainisha kuwa mawakala wa vyama vya siasa wataruhusiwa kuwepo katika vituo vya kuandikisha wapiga kura ili kuhakikisha uwazi na kuleta amani katika zoezi hilo.

Wakati huo huo, Tume imetoa kibali kwa asasi za kiraia 157 kutoa elimu ya mpiga kura na asasi 33 kwa ajili ya uangalizi wa zoezi la uboreshaji, likiongozwa na kauli mbiu "Kujiandikisha kuwa Mpiga Kura ni Msingi wa Uchaguzi Bora."

Uboreshaji wa Daftari la Kudumu la Wapiga Kura Mkoani Shinyanga utafanyika sambamba na Mkoa wa Mwanza kuanzia tarehe 21 hadi 27 Agosti, 2024 katika kipindi hicho, vituo vya kuandikisha wapiga kura vitafunguliwa saa 2:00 asubuhi na kufungwa saa 12:00 jioni.

Kwa Mkoa wa Shinyanga, Tume inatarajia kuandikisha wapiga kura wapya 209,951, ikiwa ni ongezeko la asilimia 21 ya wapiga kura 995,918 waliopo kwenye daftari la kudumu. Baada ya zoezi hili, Mkoa wa Shinyanga utakuwa na jumla ya wapiga kura 1,205,869. Vituo 1,339 vitatumika kwa uandikishaji mwaka huu, ikiwa ni ongezeko la vituo 122 ikilinganishwa na mwaka 2019/20.

Tume Huru ya Taifa ya Uchaguzi inawataka wananchi wa Shinyanga na Mwanza kujitokeza kwa wingi kujiandikisha au kurekebisha taarifa zao ili waweze kushiriki uchaguzi wa serikali za mitaa, vijiji, na vitongoji utakaofanyika Novemba 2024, pamoja na uchaguzi mkuu wa mwaka 2025.