Mbunge wa Jimbo la Shinyanga mjini ambaye pia ni Naibu Waziri ofisi ya Waziri mkuu Kazi, Vijana, Ajira na wenye ulemavu Paschal Patrobas Katambi, kesho Jumamosi tarehe 31.08.2024, atakabidhi zawadi kwa washindi wa Kinyang’anyiro cha FUNGUKA USHINDE NA KATAMBI, kilichokuwa kikiendeshwa na Redio Faraja.
Zoezi la kukabidhi zawadi kwa washindi vikiwemo vikundi kutoka maeneo mbalimbali ya Manispaa ya Shinyanga, litanyika katika uwanja wa SHY-COM mjini Shinyanga kuanzia saa 3:00 asubuhi na litarushwa mubashara (Live) na Redio Faraja na kwenye ukurasa huu wa Facebook, unaopatikana kwa anuani ya Radio Farajatz.
Zawadi zitazokabidhiwa ni nyongeza ya mtaji kwa makundi maalum ya Wananwake, Vijana, Wazee na wenye ulemavu pamoja na kwa watu binafsi.
Washindi hao wamepatikana kwa kumudu kujibu kwa usahihi maswali yaliyokuwa yakiulizwa kuhusu utekelezaji wa miradi mbalimbali ya Maendeleo katika Jimbo la Shinyanga mjini, ikiwemo ya kimkakati inayotekelezwa na Rais Dkt. Samia Suluhu Hassan.
Maswali hayo yalikuwa sehemu ya Programu maalum iliyopewa jina la Shinyanga mpya ya Katambi, ambayo pamoja na mambo mengine, imelenga kuwapa wananchi mrejesho wa moja kwa moja kuhusu namna ambavyo Mbunge wao anawajibika katika utekelezaji wa mipango ya maendeleo ikiwemo ahadi alizozitoa wakati wa uchaguzi.
Programu hiyo ni sehemu ya Mkakati wa Redio Faraja wa kuwaunganisha wananchi na viongozi wao waliowachagua, hatua ambayo imelenga kuimarisha misingi ya utawala bora, uwazi na uwajibikaji.