Na Mapuli Kitina Misalaba
Katibu wa Jumuiya ya Shujaa wa Maendeleo na
Ustawi wa Jamii Tanzania (SMAUJATA) kanda ya Ziwa, Daniel Patrick Kapaya,
amekutana na Askofu Mkuu wa Kanisa la Orthodox nchini Tanzania, Francis Laurent
Bukombe, maarufu kama Bludah, leo katika ofisi za SMAUJATA mkoani Shinyanga.
Mazungumzo hayo yameangazia kuimarisha
ushirikiano katika kupambana na ukatili wa kijinsia, hususan dhidi ya wanawake
na watoto.
Akizungumza wakati wa kikao hicho, Bwana Kapaya
ameainisha mafanikio na changamoto zinazoikabili SMAUJATA katika utekelezaji wa
majukumu yake ambapo miongoni mwa changamoto alizozitaja ni ukosefu wa usafiri
na vifaa vingine muhimu kwa ofisi za jumuiya hiyo mkoani Shinyanga.
Kwa upande wake, Askofu Bukombe amepongeza
juhudi za SMAUJATA katika kupinga ukatili wa kijinsia, ikiwemo ubakaji na
ulawiti, huku akisisitiza kuwa kanisa lake litaendelea kushirikiana na SMAUJATA
katika mapambano hayo. "Tutafanya
kazi kwa pamoja kuhakikisha tunapambana na vitendo visivyompendeza Mungu ili kuimarisha
amani na usalama wa jamii," amesema
Askofu Bukombe.
Katika hatua nyingine, Askofu huyo ameahidi
kusaidia kutatua changamoto zinazokwamisha utekelezaji wa majukumu ya SMAUJATA,
ili kurahisisha kazi za viongozi wa jumuiya hiyo.
Aidha, Askofu Bukombe ameipongeza Serikali ya
awamu ya sita chini ya Rais Samia Suluhu Hassan kwa ushirikiano wake mzuri na
viongozi wa dini, huku akisisitiza umuhimu wa kuendelea kushirikiana kwa
maslahi ya jamii.
Katibu wa SMAUJATA kanda ya ziwa Bwana Kapaya
kwa amemshukuru Askofu Bukombe kwa msaada aliouahidi, ambapo amesema kuwa
SMAUJATA itaendelea kutekeleza majukumu yake kwa kufuata sheria na kanuni za
nchi.
Jumuiya ya SMAUJATA inatekeleza majukumu yake
chini ya Wizara ya Maendeleo ya Jamii, Jinsia, Wanawake, na Makundi Maalum, ambayo
inaongozwa na Waziri Dkt. Dorothy Gwajima.
Mapambano dhidi ya ukatili wa kijinsia
yanaendelea kuwa ajenda ya kipaumbele kwa SMAUJATA, ikiwa ni sehemu ya jitihada
za kulinda haki za kila mmoja katika jamii.
Katibu wa Jumuiya ya Shujaa wa Maendeleo na
Ustawi wa Jamii Tanzania (SMAUJATA) kanda ya Ziwa, Daniel Patrick Kapaya, akimpokea
Askofu Mkuu wa Kanisa la Orthodox nchini Tanzania, Francis Laurent Bukombe, baada
ya kuwasili katika ofisi ya SMAUJATA Mkoa wa Shinyanga leo Septemba 11,2024.
Katibu wa Jumuiya ya Shujaa wa Maendeleo na Ustawi wa Jamii Tanzania (SMAUJATA) kanda ya Ziwa, Daniel Patrick Kapaya, na Askofu Mkuu wa Kanisa la Orthodox nchini Tanzania, Francis Laurent Bukombe, wakiendelea na mazungumzo ya pamoja katika ofisi ya SMAUJATA Mkoa wa Shinyanga leo Septemba 11,2024.
Askofu Mkuu wa Kanisa la Orthodox nchini
Tanzania, Francis Laurent Bukombe, akipongeza kazi za SMAUJATA.
0 Comments