Na Mapuli Kitina Misalaba
Msimamizi wa uchaguzi wa serikali za mitaa katika
Halmashauri ya Wilaya ya Shinyanga, Dkt. Kalekwa Kasanga, ametoa wito kwa
wananchi wa Halmashauri hiyo kujitokeza kwa wingi kujiandikisha kwenye daftari
la wakazi ili kupata haki ya kupiga kura kwenye uchaguzi wa Serikali za Mitaa
unaotarajiwa kufanyika Novemba 27, 2024.
Dkt. Kalekwa ametoa wito huo wakati wa bonanza la
michezo ambalo limefanyika katika Stendi ya Mabasi ya Salawe, na kwamba
lililenga kuhamasisha wananchi kushiriki zoezi la kujiandikisha kwenye daftari
la wakazi.
“Siku
za kujiandikisha zimebaki chache, zoezi hili lilianza Oktoba 11 na litatamatika
tarehe 20, naomba wananchi mjitokeze kwa wingi ili mtumie haki yenu ya kikatiba
ya kupiga kura na kuchagua viongozi bora watakaowaletea maendeleo."amesema
Dkt. Kalekwa
Bonanza hilo limevutia wakazi wengi wa Salawe na
maeneo jirani, wakifurahia michezo mbalimbali kama kuvuta kamba, kukimbiza
kuku, kukimbia na magunia, na ngoma za kitamaduni.
Michezo hiyo imeandaliwa kwa makusudi ya kuwasilisha
ujumbe muhimu wa kujiandikisha kwenye daftari la wakazi, ambapo viongozi wamesisitiza
umuhimu wa ushiriki wa wananchi katika mchakato wa uchaguzi.
Diwani wa Kata ya Salawe, Mhe. Joseph Buyugu, ameungana
na Dkt. Kalekwa kuwahimiza wananchi, hasa wale ambao bado hawajajiandikisha,
kuhakikisha wanatumia muda uliosalia kujiandikisha.
“Siku siyo rafiki, naomba wale ambao bado
hawajajiandikisha wafanye hivyo ili wasikose fursa ya kupiga kura na kuchagua
viongozi wanaowataka," amesema Mhe. Buyugu.
Misalaba Media imezungumza na baadhi ya wananchi
walioshiriki bonanza hilo, ambao wameipongeza Halmashauri ya Wilaya ya
Shinyanga kwa jitihada zake za kuhamasisha ushiriki katika zoezi la
kujiandikisha.
Wananchi hao wamesema kuwa wengi wao tayari
wamejiandikisha na hawajakutana na changamoto yoyote katika mchakato huo.
Aidha, wananchi waliohudhuria bonanza wameeleza
kufurahishwa na ushirikiano mzuri uliopo kati ya viongozi wa Halmashauri na
jamii, hali ambayo inachangia kuongeza mwamko wa wananchi kuhusu uchaguzi ujao.
Uchaguzi wa serikali za mitaa, ambao unatarajiwa
kufanyika Novemba 27 mwaka huu, utawahusisha wananchi katika kuchagua wenyeviti
wa vijiji, vitongoji, mitaa pamoja na wajumbe.
Zoezi hilo ni
muhimu kwa maendeleo ya jamii kwani litatoa fursa kwa wananchi kuchagua
viongozi wenye uwezo wa kuleta mabadiliko chanya katika maeneo yao.
Halmashauri ya Wilaya ya Shinyanga imeendelea kuweka msisitizo mkubwa katika kuhakikisha wananchi wote wanapata nafasi ya kujiandikisha kwa wakati, hatua ambayo inawawezesha kushiriki kikamilifu kwenye uchaguzi wa Serikali za Mitaa.
Diwani wa Kata ya Salawe, Mhe. Joseph Buyugu, akizungumza
kwenye bonanza la michezo Oktoba 17, 2024.
Viongozi wakifuatilia michezo mbalimbali katika bonanza hilo.
Mchezo wa kuvuta kamba ukiendelea kati ya madereva Bajaji
na madereva Pikipiki.
Msimamizi wa uchaguzi wa serikali za mitaa katika
Halmashauri ya Wilaya ya Shinyanga, Dkt. Kalekwa Kasanga, akiendelea na zoezi
la kukabidhi zawadi kwa washindi mbalimbali katika bonanza hilo la michezo.
Msimamizi wa uchaguzi wa serikali za mitaa katika Halmashauri ya Wilaya ya Shinyanga, Dkt. Kalekwa Kasanga, akiendelea na zoezi la kukabidhi zawadi kwa washindi mbalimbali katika bonanza hilo la michezo.
