Na Mapuli Kitina Misalaba
Mkuu wa Wilaya ya Kahama, Mhe. Mboni Mhita, ameendelea kusisitiza umuhimu wa wananchi kujiandikisha katika daftari la wakazi wa wilaya hiyo, akisema hatua hiyo ni ya msingi katika kuboresha utoaji wa huduma za kijamii.
Akizungumza na wananchi wakati wa kampeni ya kuhamasisha zoezi hilo, Mhe. Mhita amesema kuwa serikali inahitaji kuwa na taarifa sahihi za wakazi ili kupanga vyema miradi ya maendeleo, ikiwemo huduma za afya, elimu, na miundombinu.
Amesema kuwa wananchi wanapaswa kujitokeza kwa wingi ili kuhakikisha wanapata fursa ya kushiriki kikamilifu katika mipango ya maendeleo.
Aidha, ameongeza kuwa daftari hilo litasaidia pia katika kuboresha usalama wa maeneo ya makazi kwa kuwa na taarifa sahihi za wakazi.
Mkuu huyo wa Wilaya ametoa wito kwa viongozi wa vijiji na mitaa kuendelea kuwahamasisha wananchi kujiandikisha kabla ya zoezi hilo kufikia ukomo wake mwishoni mwa mwezi huu.
Kwa upande wao, baadhi ya wananchi waliohudhuria mkutano huo wameonesha kufurahishwa na jitihada hizo za serikali, wakisema kuwa zoezi hilo litasaidia kuimarisha huduma za kijamii katika maeneo yao.
Zoezi la uandikishaji wa wakazi litahitimishwa Oktoba 20, 2024, huku serikali ikiahidi kuwekeza zaidi katika uhamasishaji wa jamii ili kuongeza idadi ya waliojiandikisha.
