Na Mapuli Kitina Misalaba
Ashraph Majaliwa, aliyekuwa Mwenyekiti wa Mtaa wa
Viwandani kwa kipindi cha miaka mitano, amechukua rasmi fomu ya kugombea tena
nafasi hiyo ili kuendelea kuwatumikia wananchi wa mtaa huo kupitia Chama Cha
Mapinduzi (CCM).
Akizungumza na Misalaba Media mara baada ya kuchukua
fomu, Majaliwa ameahidi kudumisha mshikamano, umoja, na kufanya kazi kwa bidii,
akiwahakikishia wakazi wa Viwandani kuwa malengo ya Rais Samia Suluhu Hassan
yatatekelezwa kikamilifu kwenye mtaa huo.
Aidha,
ameahidi kuendelea kutoa fursa za ajira kwa wakazi kupitia viwanda vidogo
vilivyopo Viwandani, kwa lengo la kusaidia vijana na wakazi ambao bado hawana
ajira.
"Nimechukua
fomu leo kugombea uenyekiti wa mtaa huu wa Viwandani mimi na timu yangu tuko
tayari kushirikiana na mama yetu Rais Samia kuhakikisha miradi yote inayokuja
inaleta manufaa kwa wananchi kama ilivyokusudiwa,"
amesema Majaliwa kwa kujiamini.
Ameongeza kuwa viwanda vya kuchakata mazao vilivyopo
kwenye mtaa huo vitatumiwa kwa manufaa ya wakazi wote, hasa kwa wale ambao
hawana ajira za kudumu.
Kwa upande wake, Diwani wa Kata ya Mjini, Mhe.
Gulamhafeez Abubakari, amepongeza wananchi na wanachama wa CCM kwa kuwapa sapoti wenyeviti wao
katika zoezi la uchukuaji wa fomu kwenye mitaa yote minne ya kata hiyo.
Ameeleza kuwa chama kimejipanga kuhakikisha kinapata
ushindi, huku akiwataka wakazi wa kata ya Mjini kuwa na imani na wagombea wao.
Uchaguzi wa Serikali za Mitaa mwaka huu 2024 unatarajiwa kufanyika Novemba 27, ambapo wenyeviti wa mitaa, vijiji, vitongoji, na wajumbe wao watachaguliwa rasmi kwa muhula ujao wa uongozi.
