Mwenyekiti wa CHADEMA kata ya mjini, Bwana Nicholaus Luhende, akizungumza na Misalaba Media leo Oktoba 31, 2024.
Na Mapuli Kitina Misalaba
Chama cha Demokrasia na Maendeleo (CHADEMA), kata ya
Mjini jimbo la uchaguzi Shinyanga mjini, kimetoa wito kwa wananchi wa kata hiyo
kujitokeza kwa wingi ifikapo Novemba 27, 2024 ili kuchagua viongozi
wanaowataka.
Mwenyekiti wa CHADEMA kata ya mjini, Bwana Nicholaus
Luhende, ametoa wito huo leo wakati akizungumza na Misalaba Media baada
wagombea nafasi ya mwenyekiti kutoka mitaa mbalimbali kurudisha fomu zao.
Kwa mujibu wa Luhende, wagombea wa CHADEMA katika
mitaa miwili kati ya minne wamekamilisha zoezi la kuchukua na kurudisha fomu za
kugombea nafasi za wenyeviti wa mitaa na wajumbe.
"Tumefanikiwa
kurudisha fomu katika mitaa yote ambayo tumepanga wagombea wito wangu kwa
wananchi ni kuwa CHADEMA tumewaandaa wagombea wenye sifa na uwezo wa
kuwatumikia wananchi kwa ufanisi," amesema Luhende.
Luhende amewahimiza wananchi kuzingatia umuhimu wa
kupiga kura kwa viongozi wanaoamini katika maendeleo na wenye dhamira ya kuleta
mabadiliko.
“Wananchi
kwa sasa wanatambua tofauti kati ya uongozi bora na ule ambao umekuwa na changamoto tunawataka wajitokeze kwa wingi na kuchagua
viongozi wa kweli,” amesema Luhende.
Aidha, wagombea wa nafasi ya mwenyekiti wa mtaa wa
Buzuka Thomas Gumalija Machibya na Mkasha John Emmanuel wa mtaa Viwandani,
ambao tayari wamerejesha fomu zao, wamesema kuwa hawajakumbana na changamoto
yoyote katika hatua ya kuchukua na kurudisha fomu.
Wametoa wito kwa mamlaka zinazohusika kuhakikisha
uwazi na haki katika mchakato mzima wa uchaguzi.
Zoezi la kurejesha fomu linatarajiwa kufikia tamati
kesho, Ijumaa, Novemba 1, 2024, huku uchaguzi wa serikali za mitaa ukipangwa
kufanyika rasmi Novemba 27, 2024.
Siku hiyo, wananchi watapata nafasi ya kuchagua wenyeviti wa mitaa, vijiji, na vitongoji katika maeneo mbalimbali ya nchi.
