Na Mapuli Kitina Misalaba
Shirika la Uzao Wetu limewahimiza wazazi, walezi, na
jamii kwa ujumla kuwalea watoto katika mazingira bora yanayoendana na vipaji
vyao ili kuwaepusha na vitendo vya ukatili vinavyozidi kuongezeka.
Wito huo umetolewa na Mkurugenzi wa Shirika hilo,
Yusuph Mtobela, baada ya kutoa semina kwa walimu wa watoto katika Kanisa la Baptist
Ngokolo, mjini Shinyanga na kwamba Semina hiyo ililenga kuwapa walimu hao elimu
juu ya mbinu bora za kuwafundisha watoto malezi yanayokuza vipaji.
Mtobela amesema kuwa vitendo vya ukatili
vinaongezeka kutokana na ukosefu wa malezi bora ndani ya familia na jamii
ambapo ameomba ushirikiano wa karibu katika kuimarisha ulinzi na usalama wa
watoto.
Ameendelea kueleza kuwa, malezi jumuishi ni muhimu
kwa watoto kwani yanawapa nafasi ya kukua wakiwa na uelewa mzuri wa uwezo wao
ambapo amesema kuwa shirika lake linaamini kuwa malezi bora yatakayoitikia
kipaji ni njia madhubuti ya kupunguza vitendo vya ukatili na kuhakikisha watoto
wanalelewa katika njia sahihi.
“Uzao wetu tunashughulika sana na masuala ya ulinzi wa mtoto katika nyanja zote lakini tumejikita kwenye malezi yanayoitikia kipaji
kama silaha moja ya ulinzi na usalama wa mtoto kwa sababu mtoto ukimlea
kulingana na kipaji chake atakuwa na uwezo wa kujitetea lakini pia malezi ya
kipaji na malezi jumuishi ni lazima watoto wakae pamoja kwa ujumla tunasema
malezi ya watoto ni malezi ya jamii”.
“Malezi mazuri ambayo kwa sasa hivi watu wengine
wanasema haiwezekana mimi nakwambia inawezekana malezi yanayoitikia kipaji ni
malezi yatakayotutoa kwenye ukatili wa aina yoyote ninaimani ya kwamba kila
siku mungu anapotujalia uzima tunaweza kushirikiana na kila mtu ambaye yuko kwa
ajili ya ulinza na usalama wa mtoto”.amesema Mtobela
“Ili
watoto wawe salama na wenye ustawi mzuri, ni lazima wazazi, walezi, na jamii
kwa ujumla washirikiane kwa dhati katika kuwapa malezi yanayoendana na vipaji
vyao”.
Katika semina hiyo, mwalimu wa watoto kutoka Kanisa
la Baptist Ngokolo, Jackson Kalijeje, ameelezea umuhimu wa kufuata mafundisho
ya kidini kama msingi wa malezi bora kwa watoto huku akirejea maandiko ya
Biblia, alisema mafundisho hayo yanawapa wazazi na walezi mwongozo wa jinsi ya
kumlea mtoto katika njia ipasayo.
“Kitabu
cha Methali 22:6 kinasema, 'Mlee mtoto katika njia impasayo, naye hataiacha
hata atakapokuwa mzee,'” amesema Kalijeje, ambapo ameongeza
kuwa kanisa hilo limeona upungufu mkubwa wa malezi katika jamii, hasa kwa
watoto, hivyo wamechukua jukumu la kuwaelimisha wazazi na walezi ili
kuhakikisha watoto wanalelewa kwa kufuata njia sahihi.
Kalijeje alifafanua kuwa kanisa lao limekuwa na
ushirikiano wa karibu na Shirika la Uzao Wetu katika kuwafundisha watoto ndani
ya kanisa na jamii inayowazunguka na kwamba ushirikiano huo umeanza kuzaa
matunda ambapo mafundisho yaliyotolewa yanaanza kuonyesha matokeo chanya katika
malezi ya watoto.
“Tumeona kuna upungufu mkubwa sana wa malezi
kwa watoto wetu hivyo sisi kama kanisa la Baptist tulina neno la Mungu katika
kitabu kile cha Methali sura ya 22 mstari wa 6 inasema mlee mtoto katika njia
impasayo naye hataiacha hata atakapokuwa mzee”.
“Tuliona
kumbe kuna nafasi kubwa sana ya mzazi, kanisa na jamii kumlea mtoto, katika
sehemu hiyo sasa sisi kama kanisa ikatusukuma mbele zaidi kuangalia ni namna
gani tunaweza kushughulika na watoto waliomo ndani ya kanisa na jamii
inayotuzunguka tulilipata kanisa la Uzao wetu kwa lengo la kushirikiano nalo kwa
sasa tumepiga hatua sana tumeanza kuyaona matokeo kupitia mafundisho ambayo
tunayatoa kwa kushirikiana na shirika la Uzao wetu”.amesema
Kalijeje
Walimu waliohudhuria semina hiyo wamelipongeza na
kulishukuru Shirika la Uzao Wetu kwa kuandaa mafunzo hayo muhimu ambapo
wamesema kuwa elimu hiyo imewawezesha
kufahamu mbinu bora za kuwalea watoto kwa njia zinazokuza vipaji vyao, na hivyo
kuwasaidia kuwa na uwezo wa kujilinda dhidi ya vitendo vya ukatili na madhara
mengine yanayoweza kuwapata.
Baadhi ya walimu walioshiriki semina hiyo walieleza
furaha yao kwa kupata fursa hiyo na wakaahidi kuwa mabalozi wa kueneza elimu
hiyo kwa wazazi na walezi katika maeneo yao, ili kuhakikisha watoto wanalelewa
katika mazingira salama na yenye manufaa kwa mustakabali wao.
Shirika la Uzao Wetu limeendelea na juhudi zake za
kuhakikisha watoto wanalelewa katika mazingira yanayokuza vipaji vyao, hatua
ambayo inatajwa kuwa muhimu katika kuwalinda dhidi ya vitendo vya ukatili
ambavyo vimekuwa vikiongezeka siku hadi siku.
Ujumbe wa Mkurugenzi wa Uzao Wetu na mwalimu wa Kanisa la Baptist umesisitiza umuhimu wa ushirikiano kati ya wazazi, jamii, na taasisi za kidini katika kuwasaidia watoto kuwa na malezi bora.
Aidha katika semina hiyo walimu wa watoto wamefundishwa nyimbo na michezo mbalimbali ya watoto.
Mwalimu wa watoto kutoka Kanisa la Baptist Ngokolo,
Jackson Kalijeje, akifundisha.
Mkurugenzi wa Shirika hilo, Yusuph Mtobela akitoa
elimu kwa walimu wa watoto kanisa la Baptist kuhusu malezi yanayokuza vipaji
kwa watoto.
