Na Mapuli Kitiba Misalaba
Katika hatua muhimu kuelekea uchaguzi wa Serikali za
Mitaa, wagombea wa nafasi ya mwenyekiti kupitia Chama cha Mapinduzi (CCM)
katika mitaa sita ya kata ya Ndembezi, Manispaa ya Shinyanga, leo wamechukua
rasmi fomu za kugombea.
Zoezi hilo limeambatana na maandamano ya amani, ambapo
wagombea wametembelea mtaa kwa mtaa, wakipokea sapoti kutoka kwa wanachama na
wapenzi wa chama hicho.
Wagombea hao ni pamoja na Onesmo Mahenda Ruhende
anayewania nafasi ya mwenyekiti wa mtaa wa Butengwa, Mariam Mikidadi Mdoe
anayegombea mtaa wa Ndembezi, Bakari Juma kutoka mtaa wa Mabambase, Seif Nassor
Hamed wa mtaa wa Mbuyuni, Tabitha Costantine Shilingi wa Tambukareli, na
Solomon Nalinga Najulwa ambaye anagombea tena nafasi ya mwenyekiti wa mtaa wa
Dome ambapo kila mmoja wao anagombea kwa tiketi ya CCM.
Akizungumza na MISALABA MEDIA, katibu wa CCM kata ya
Ndembezi, Pendo Sawa, ameelezea furaha yake kuhusu kujitokeza kwa wanachama wa
chama hicho katika kuwasindikiza wagombea wao.
"Leo
wenyeviti wetu waliopita kwenye kura za maoni ndani ya chama wamejitokeza
kuchukua fomu. Nawaomba wanachama, wapenzi, na wakeleketwa wa CCM waungane nasi
kesho wakati wa kurudisha fomu," amesema Pendo Sawa.
Katibu Mwenezi wa CCM kata ya Ndembezi Issa Said
Stima, amesisitiza kuwa chama kimejipanga vema kwa ajili ya uchaguzi huo huku akionyesha
kujiamini kuhusu ushindi wa wagombea wao.
"CCM tumejipanga kwenye uchaguzi tunawaomba
wenzetu wasikimbie na mpira makwapani sisi tuko tayari kuingia
majukwaani," amesema Stima.
Zoezi la kuchukua fomu limehudhuriwa na viongozi
mbalimbali wa CCM, ikiwemo Mwenyekiti wa UVCCM Wilaya ya Shinyanga Mjini,
Abdulaziz Said Sakala, pamoja na katibu wa UVCCM Wilaya hiyo, Naibu
Katalambullah.
Uchaguzi wa Serikali za Mitaa unatarajiwa kufanyika
Novemba 27, 2024, ambapo wananchi watapata nafasi ya kuchagua viongozi wao wa
mitaa, vijiji, vitongoji, na wajumbe wao.
Hii ni nafasi muhimu kwa wananchi kushiriki katika
uongozi na maendeleo ya maeneo yao.
Awali wakati wa maandamano ya amani mtaa kwa mtaa.
Seif Nassor Hamed mgombea wa nafasi ya mwenyekiti wa
mtaa wa Mbuyuni kupitia CCM akikabidhiwa fomu yake leo Oktoba 29, 2024.
Seif Nassor Hamed mgombea wa nafasi ya mwenyekiti wa mtaa wa Mbuyuni kupitia CCM.
Solomon Nalinga Najulwa ambaye anagombea tena nafasi
ya mwenyekiti wa mtaa wa Dome kupitia chama cha mapinduzi CCM, akikabidhiwa
fomu yake leo Oktoba 29, 2024.
