Mkuu wa Mkoa wa Shinyanga Mhe. Anamringi Macha akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Na Mapuli Kitina Misalaba
Shinyanga inajiandaa kwa uchaguzi wa serikali za
mitaa unaotarajiwa kufanyika mwaka huu, na Mkuu wa Mkoa wa Shinyanga, Mhe.
Anamringi Macha, ametoa rai kwa wananchi kujitokeza kwa wingi kujiandikisha na
kushiriki kikamilifu katika uchaguzi huo.
Akizungumza wakati wa uzinduzi wa zoezi la
uandikishaji wapiga kura, Mhe. Macha amesisitiza umuhimu wa kuchagua viongozi
bora watakaosaidia kuleta maendeleo ya mkoa.
Mhe. Macha amewaomba wakazi wa Shinyanga kuchagua
viongozi wenye uwezo wa kuwatumikia wananchi kwa uadilifu, huku akiwataka
viongozi wa vyama vya siasa kuhakikisha uchaguzi unafanyika kwa amani na
utulivu.
"Tunahitaji
viongozi watakaolinda rasilimali zetu na kusaidia miradi ya maendeleo, si wale
mafisadi ambao watashindwa kutekeleza wajibu wao,"
amesisitiza Macha.
Katika hotuba yake, amewahamasisha wanaume na
wanawake wenye sifa kuwania nafasi za uongozi, huku akiwapongeza akina mama kwa
kuonyesha mwamko mkubwa wa kushiriki.
"Akina
mama wamechangamka sana safari hii, tunataka pia wanaume wasibaki nyuma Uchaguzi
huu ni wa kila mmoja wetu," amesema.
Mkuu wa Mkoa amehakikisha kuwa uchaguzi wa mwaka huu
utakuwa wa haki, huru, na wa amani, akiongeza kuwa serikali imejipanga vizuri
kuhakikisha usalama unadumishwa kabla, wakati, na baada ya uchaguzi. "Tunataka uchaguzi huu uwe wa haki na
amani hatutaki ugomvi au vurugu; kila mmoja ana haki ya kugombea lakini kwa
njia ya amani," amesema.
Amewataka wagombea kufuata taratibu na sheria za
uchaguzi, huku akiwahimiza wananchi kutumia haki yao ya kupiga kura bila
vitisho au ushawishi wa aina yoyote.
Pia amewahimiza
wananchi kushiriki kikamilifu katika zoezi la kujiandikisha ili waweze kuchagua
viongozi wanaofaa na kuleta mabadiliko chanya katika jamii.
Zoezi la uandikishaji wapiga kura katika Manispaa ya
Shinyanga litaanza rasmi tarehe 11 Oktoba 2024 na kumalizika tarehe 20 Oktoba
2024 na kwamba lengo kuu ni kuandikisha
wapiga kura 120,345 kutoka maeneo mbalimbali ya manispaa, ikiwa ni pamoja na
kata 17, vijiji 17, vitongoji 84, na mitaa 55.
Charles Dominic, Msimamizi Msaidizi wa Uchaguzi
katika Manispaa ya Shinyanga, ametoa wito kwa wananchi kujiandikisha kwa
wakati, akisisitiza kuwa zoezi hilo litafanyika kwa uwazi na haki.
Vituo vya uandikishaji vimewekwa katika maeneo
mbalimbali ili kuhakikisha kila mkazi ana fursa ya kujiandikisha bila usumbufu.
Meya wa Manispaa ya Shinyanga, Mhe. Elias Masumbuko,
amesisitiza umuhimu wa wananchi kutumia fursa hii ya kujiandikisha ili waweze
kushiriki katika uchaguzi.
"Ni
jukumu la kila mmoja wetu kuhakikisha tunaongoza kwa kushiriki na kuchagua viongozi
wanaotufaa kwa maendeleo yetu ya baadae,"
amesema Masumbuko.
Baadhi ya viongozi wa vyama vya siasa mkoani
Shinyanga wamehimiza kufanyika kwa uchaguzi wa haki, huru, na wa amani,
wakisisitiza kuwa hili ni jambo muhimu kwa maendeleo ya jamii.
Wakizungumza na Misalaba Media, viongozi hao wamesema
kuwa uchaguzi huru na wa haki ndio msingi wa demokrasia na ustawi wa taifa,
hivyo ni muhimu wananchi wahakikishiwe mazingira salama na ya uwazi wakati wote
wa mchakato wa uchaguzi.
Viongozi hao wameongeza kuwa, ili kufanikisha uchaguzi
wa amani, vyama vya siasa vinatakiwa kuepuka ghasia na uchochezi, na badala
yake kuzingatia hoja za maendeleo na sera zinazolenga kuboresha hali za
wananchi.
Wakisisitiza umuhimu wa amani, viongozi hao
wameeleza kuwa, bila uchaguzi wa amani, maendeleo ya kijamii na kiuchumi
hayawezi kufikiwa.
Baadhi ya wananchi wa wa Manispaa ya Shinyanga wamesema wanatambua umuhimu wa
kushiriki katika hatua muhimu ya uchaguzi wa serikali za mitaa, wakisema kuwa
mchakato huu unatoa fursa kwa kila mmoja kumchagua kiongozi bora mwenye uwezo
wa kutatua changamoto za jamii.
Wameeleza kuwa kwa kuchagua viongozi wenye sifa, watakuwa wanachangia kwa kiasi kikubwa kuleta maendeleo ya kweli katika maeneo yao.
Aidha, wananchi hao wameomba kuendelea kutolewa kwa elimu ya mpiga kura ili kuwasaidia kuelewa vizuri umuhimu wa kushiriki katika hatua zote za uchaguzi.
Wamebainisha kuwa elimu hiyo itasaidia wananchi
kujua haki na wajibu wao, kuanzia kwenye hatua ya kujiandikisha hadi kushiriki
mikutano ya hadhara, jambo ambalo litawasaidia kufanya maamuzi sahihi wakati wa
kupiga kura.
Wakizungumza na Misalaba Media, wananchi hao
wamehimiza viongozi wa serikali na wadau wengine kuhakikisha wanatoa elimu ya
kutosha kuhusu uchaguzi, ili kuongeza hamasa na uelewa kwa wapiga kura.
Wamesema, bila uelewa wa kutosha, itakuwa vigumu kwa
wananchi kuchagua viongozi wanaoweza kutatua changamoto zinazowakabili, hivyo
ni muhimu elimu hiyo imfikie kila mmoja.
Mkoa wa Shinyanga uko tayari kwa uchaguzi wa
serikali za mitaa wa 2024, ambapo wananchi wanaendelea kuhamasishwa kujitokeza
kwa wingi kujiandikisha na kushiriki kikamilifu.
Uchaguzi huu unalenga kuweka viongozi bora watakaosukuma gurudumu la maendeleo mbele, huku usalama na amani vikihakikishwa kwa kila hatua.
Mkuu wa Mkoa wa Shinyanga Mhe. Anamringi Macha akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Mkuu wa Wilaya ya Shinyanga Wakili Julius Mtatiro akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Mkuu wa Wilaya ya Shinyanga Wakili Julius Mtatiro akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Msimamizi Msaidizi wa Uchaguzi Halmashauri ya Manispaa ya Shinyanga, Charles Dominic Kafutila akitoa maelezo kuhusu uandikishaji wapiga kura wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Mstahiki Meya wa Manispaa ya Shinyanga , Mhe. Elias Ramadhan Masumbuko akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Katibu Tawala Wilaya ya Shinyanga, Said Kitinga akizungumza wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
Burudani ikiendelea wakati wa Uzinduzi wa Zoezi la Uandikishaji wa Daftari la Wapiga Kura Serikali za Mitaa 2024 katika Halmashauri ya Manispaa ya Shinyanga.
TAZAMA VIDEO
TAZAMA VIDEO