Na Mapuli Kitina Misalaba
Askofu wa Jimbo Katoliki Shinyanga, Mhashamu
Liberatus Sangu, ameongoza Misa Takatifu katika Parokia ya Mwamapalala, ambapo
waimarishwa 250 wamepokea Sakramenti ya Kipaimara.
Katika mahubiri yake, Askofu Sangu amekemea vikali
tabia ya baadhi ya watu kujinufaisha kwa shida za wengine, akisema kuwa
mwenendo huo ni dhambi mbele ya Mungu.
Amehimiza waumini kuwa vyombo vya haki, upendo, na
mshikamano badala ya kujinufaisha kwa mateso ya wengine.
"Wapo
watu wanaotumia mahangaiko na shida za wengine kujinufaisha. Angalia wagonjwa
hospitalini, pengine unataka kupata dawa, lazima utoe kitu. Wanajinufaisha kwa
shida za wengine."
"Juzi
hapa limeanguka lile jengo la Kariakoo. Watu wamejitokeza kuanza kuchangisha
michango kwa udanganyifu, wakisema ni fursa. Hii ni dhambi kubwa mbele za
Mwenyezi Mungu."amesema Askofu Sangu
Askofu Sangu ameendelea kuonya juu ya dhuluma
zinazotokea katika maeneo mbalimbali ya kijamii, ikiwemo misiba na masuala ya
mirathi akitaja kuwa ni lazima jamii ipambane na tabia hizo zinazoleta huzuni
na maumivu kwa familia.
"Na
hii ndiyo huwa inatokea hata kwenye misiba yetu. Wale wanaoiba rambirambi,
wanachangisha kwenye daftari, daftari linazunguka, wanaiba rambirambi wakisema
ni fursa. Tusijinufaishe na shida za wengine. Mbaya zaidi, mirathi ya watoto
ikitoka, tunawadhulumu. Wajomba na ndugu wakubwa wanakuja kuchukua mali zote na
kumwacha mama katika hali ya mahangaiko na huzuni kubwa. Watu wanajinufaisha na
shida za wengine."
"Kamwe
tusijinufaishe na shida za wengine. Tuwe chanzo cha furaha, amani, upendo, uvumilivu,
utu wema, uaminifu, upole, na kiasi. Tuwe chombo cha umoja na upendo katika
maisha yetu."amesema Askofu Sangu
Akizungumza kuhusu uchaguzi wa serikali za mitaa
unaotarajiwa kufanyika Novemba 27, 2024, Askofu Sangu ameomba waumini kutumia
nafasi hiyo kuendeleza mshikamano wa kitaifa kwa kuchagua viongozi waadilifu.
Amehimiza watu wote waliokwisha jiandikisha
kuhakikisha wanapiga kura na kuwachagua viongozi watakaotetea maendeleo ya
kiroho na kimwili.
Pia amesisitiza umuhimu wa kuliombea taifa kuelekea
uchaguzi wa serikali za mitaa ambapo amehimiza waumini kuwa macho dhidi ya wale
wanaopandikiza chuki na kuleta mgawanyiko katika jamii.
Amewashauri wananchi kuhudhuria kampeni za wagombea
kwa umakini na kuwauliza maswali ya msingi badala ya kushabikia matusi au
kashfa dhidi ya wagombea wengine.
"Wapendwa,
najua tunaelekea kwenye uchaguzi wa serikali za mitaa. Ni nafasi ya pekee ya
kuendelea kuliombea taifa letu liendelee kubaki katika umoja, upendo, na
mshikamano. Umoja na mshikamano wetu wa Watanzania tuendelee kuudumisha,
tukiongozwa na Mungu Roho Mtakatifu."
"Tuliombee
taifa letu liendelee kustawi vizuri katika umoja, upendo, na mshikamano wetu
kama Watanzania. Tukiongozwa na Rais wetu, Samia Suluhu Hassan, na waandamizi
wake wote, ili taifa letu liendelee kustawi kiroho na kimwili. Tujiepushe na
wale ambao kauli zao na fikra zao ni za kutugombanisha Watanzania,
kutuchonganisha, au kupandikiza chuki ndani ya jamii. Tuwe macho na watu hao,
hasa kwenye kampeni zinazofanyika. Maandiko Matakatifu yanasema, tutawatambua
kwa maneno na matendo yao."
"Twendeni
kwenye kampeni zao, tuwasikilize, na tuwaulize swali moja tu: Utatufanyia
nini? Siyo kuanza kusema, 'Yule ni mwizi.' Hapana! Swali letu la msingi ni
kumuuliza, Utatufanyia nini hapa kwenye eneo letu?"
"Nawaalikeni
wote mliokwisha jiandikisha mkapige kura. Muwachague viongozi watakaotetea
maendeleo. Hatutaki wababaishaji. Tunataka watu watakaotuletea maendeleo ya
kimwili na kiroho."amesema Askofu Liberatus Sangu
Katika ziara hiyo, Askofu Sangu pia ameweka mawe ya
msingi katika miradi miwili muhimu ya Parokia ya Mwamapalala. Ameweka jiwe la
msingi katika Kigango cha Ngeme na pia nyumba ya mapadre katika Kigango cha
Mwalushu na kwamba miradi hiyo inalenga kuboresha huduma za kiroho kwa waumini
wa maeneo hayo.
Askofu Sangu amesisitiza kuwa Kanisa Katoliki
litaendelea kuwa sauti ya haki, upendo, na mshikamano katika jamii, huku
akiwataka waumini wote kuwa mfano bora wa maadili na uadilifu kwa wengine.
Padre wa parokia ya Mwamapalala Betus Maduhu amemshukuru
Askofu Sangu kwa ziara yake katika parokia hiyo.
Askofu wa Jimbo Katoliki Shinyanga, Mhashamu
Liberatus Sangu.
