Naibu Katibu Mkuu wa Chama cha Mapinduzi (CCM) Bara,
Mhe. John Mongella, akizungumza kwenye mkutano wa kufunga kampeni za uchaguzi
wa serikali za mitaa katika Mkoa wa Shinyanga leo Novemba 26, 2024.
Na Mapuli Kitina Misalaba
Naibu Katibu Mkuu wa Chama cha Mapinduzi (CCM) Bara,
Mhe. John Mongella, amewakumbusha wananchi wa Mkoa wa Shinyanga kuhakikisha wanajitokeza
kwa wingi kesho, Jumatano Novemba 27, 2024, kupiga kura kwa ajili ya kuchagua
viongozi wa serikali za mitaa, vijiji, vitongoji na wajumbe wake huku akiwaomba
kuchagua viongozi wa CCM.
Mongella ametoa wito huo wakati wa mkutano wa
kufunga kampeni za uchaguzi huo uliofanyika katika kata ya Kitangili, Manispaa
ya Shinyanga, akibainisha kuwa vitongoji, vijiji na mitaa ni msingi muhimu wa
maendeleo ya taifa.
"Tunapozungumzia msingi wa
maendeleo ni kitongoji, kijiji ni mtaa. Bila kuimarisha msingi, nyumba haiwezi
kusimama. Myambue kuwa vitongoji, vijiji na mitaa ndiyo msingi wa maendeleo,"
amesema Mongella.
Amewahimiza wananchi kutumia haki yao ya kupiga kura
kwa busara ili kuendeleza amani, mshikamano na maendeleo ambayo yamejengwa na
serikali ya CCM chini ya uongozi wa Rais Dkt. Samia Suluhu Hassan.
"WanaShinyanga, leo
tunapoenda kulala, kila mtu kwa imani yake amuombe Mwenyezi Mungu kesho afanye
maamuzi ya hekima na busara. Mmeona tokea awamu ya kwanza hadi ya sita, nchi
yetu imeendelea kuwa ya amani na mshikamano,"
amesema Mongella.
Kwa upande wa Mkoa wa Shinyanga, Mongella amesema
kuna mitaa 90, vijiji 506, na vitongoji 2,703 ambapo ameeleza kuwa tayari CCM
imepita bila kupingwa katika mitaa minne lakini amesisitiza kuwa ni muhimu
kuwapa wagombea wa CCM kura za ndiyo.
"Nawaomba kesho watu tuamke
asubuhi sana twende kwenye vituo vya kupigia kura. Vituo vitafungwa saa kumi
jioni, wanaCCM tuwe wa kwanza. Lakini tafadhali hakikisha kesho hakuna mtu
anayevaa mavazi yenye alama ya chama au kushika bendera, kwani sheria inazuia,"
amesisitiza
Mongella.
Aidha amewakumbusha wenyeviti wa serikali za mitaa,
vijiji, vitongoji na wajumbe kuwa ushindi wao utapaswa kutafsiriwa katika
kuwahudumia wananchi kwa kuhakikisha maendeleo na ustawi wa kiuchumi.
Wananchi wa Shinyanga wametakiwa kujitokeza kwa
wingi kesho ili kutekeleza jukumu hilo muhimu kwa maendeleo ya taifa.
Naibu Katibu Mkuu wa Chama cha Mapinduzi (CCM) Bara,
Mhe. John Mongella, akizungumza kwenye mkutano wa kufunga kampeni za uchaguzi
wa serikali za mitaa katika Mkoa wa Shinyanga leo Novemba 26, 2024.
Katibu wa CCM Mkoa wa Shinyanga Bi. Odilia Batimayo akizungumza kwenye mkutano wa kufunga kampeni za uchaguzi wa serikali za mitaa leo Novemba 26, 2024.
Batibayo Katibu mwenezi wa CCM Mkoa wa Shinyanga Richard Raphael Masele akizungumza kwenye mkutano wa kufunga kampeni za uchaguzi wa serikali za mitaa leo Novemba 26, 2024.
