Na Mapuli Kitina Misalaba
Takribani vijana wajasiriamali zaidi ya 30 katika
Manispaa ya Shinyanga wamehitimu mafunzo maalum yaliyoandaliwa na Shirika la
Youth And Women Emancipation (YAWE) kwa kushirikiana na Restless Development.
Mafunzo hayo yaliyofanyika kwa siku mbili, kuanzia
Novemba 11 hadi Novemba 12, 2024, yamelenga kuwapa vijana uelewa wa masuala ya
kikodi na kuwahamasisha kutambua wajibu wao katika kulipa kodi kwa ajili ya
kuchangia maendeleo ya taifa.
Mkurugenzi wa shirika la YAWE Bwana Vicent Laurent, ameeleza
kuwa mafunzo hayo yamewalenga vijana wajasiriamali wenye umri wa miaka 15 hadi
35 wanaojishughulisha na biashara zinazowaingizia kipato, na kwamba nia kuu ya
mafunzo hayao ni kujenga uelewa kuhusu umuhimu wa kulipa kodi kwa maendeleo ya
taifa.
"Kuanzia jana tumekuwa na mafunzo kwa
vijana wajasiriamali hapa Shinyanga, kwa lengo la kuwajengea uelewa kuhusu
wajibu wao katika kuchangia pato la taifa kupitia kodi,” amesema Laurent.
Katika mafunzo hayo, vijana wamefundishwa faida za
kulipa kodi na jinsi gani mchango wao unavyosaidia serikali kuboresha huduma
mbalimbali za kijamii.
Bwana Laurent amebainisha kuwa kwa kushirikiana na
shirika la Restless Development, wamefanikisha kuleta wataalam kutoka taasisi
mbalimbali, ikiwemo Polisi Forum na Manispaa ya Shinyanga, ambao wameweza kutoa
elimu na mwanga kuhusu fursa za ujasiriamali zinazowezesha vijana kukuza
biashara zao.
Bwana Laurent ameongeza kuwa hiyo ni hatua ya awali
ya kutoa mafunzo endelevu ambayo yatafuatiwa na mdahalo utakaofanyika hivi
karibuni, ambapo vijana watakutana na viongozi wa serikali kujadili changamoto
wanazokutana nazo.
“Mafunzo
haya ni mwendelezo kwa lengo la kujenga uhusiano bora kati ya serikali na
vijana ili waweze kufanya biashara zao kwa mafanikio na serikali ipate mapato,”.
Mafunzo hayo pia yametoa nafasi kwa vijana kuelewa
jinsi ya kuzifikia fursa za mikopo zinazotolewa na serikali.
Akizungumza kwa niaba ya afisa maendeleo ya jamii na
mratibu wa mikopo Manispaa ya Shinyanga, afisa maendeleo ya jamii kata ya Mjini Brandina Mwinamila amehimiza vijana kuchangamkia
mikopo yenye riba nafuu inayotolewa na serikali, ikiwemo mikopo ya asilimia
kumi ya mapato ya ndani, ambayo asilimia 4 hutengwa kwa wanawake, asilimia 4
kwa vijana, na asilimia 2 kwa watu wenye ulemavu.
Amesisitiza kuwa fursa hizo zimetolewa ili
kuwawezesha vijana kiuchumi na kuwasaidia kujenga biashara imara ambazo
zinaweza kuchangia katika kukua kwa pato la taifa.
"Halmashauri
ya Manispaa ya Shinyanga na ofisi ya Rais Samia Suluhu Hassan imeona umuhimu wa
kutoa mikopo hii kama njia ya kuwawezesha vijana kiuchumi hivyo, ni muhimu kwa
vijana kuchangamkia fursa hizi ili kuendesha maisha yao na kufikia malengo yao
ya kiuchumi." Amesema Brandina.
Mafunzo hayo ni sehemu ya mradi wa KIJANA
WAJIBIKA, unaotekelezwa katika mikoa tisa Tanzania bara, kwa lengo la
kuwajengea vijana ujasiriamali na kuwahimiza kutimiza wajibu wao wa kikodi.
Mradi huo ambao ulianza mwaka 2021 unatarajiwa kudumu
hadi mwaka 2026, na unalenga vijana wajasiriamali wenye umri kati ya miaka 15
na 35.
Vijana walioshiriki mafunzo haya walionesha
shukrani, wakieleza kuwa yamewasaidia kuelewa umuhimu wa kulipa kodi na mchango
wa kodi katika maendeleo ya nchi ambapo wameeleza kuwa sasa wana mtazamo mpya
kuhusu kodi na watazingatia kulipa kodi kwa wakati ili kuchangia maendeleo.
Mkurugenzi wa Shirika la Youth And Women
Emancipation (YAWE), Bwana Vicent Laurent, akizungumza kwenye mafunzo yao leo
Novemba 12, 2024.
Afisa maendeleo ya jamii Brandina Mwinamila akizungumza kwenye mafunzo hayo leo Novemba 12, 2024.
