Na Elisha Petro, Misalaba Media
Mahafari ya nne ya kituo cha kulea watoto cha Sunrise
Nursery and Day Care kilichopo Kitangili, Manispaa ya Shinyanga, yamefanyika
leo Jumamosi, tarehe 7 Desemba 2024, katika ukumbi wa kituo hicho ambapo Wazazi, walezi, na jamii kwa ujumla wametakiwa kuwajibika kikamilifu katika
malezi na makuzi ya watoto ili kuwaepusha na mambo hatarishi kama ukatili wa
kijinsia na utekaji.
Katika mahafali hayo, mgeni rasmi ni Simon Maximilian Kadogosa, Msimamizi wa Utafiti wa Shirika la Msalaba Mwekundu Tanzania (Monitoring and Evaluation Specialist, Tanzania Red Cross Society).
Katika hotuba yake, Kadogosa amesisitiza umuhimu wa ushirikiano kati
ya wazazi, walezi, na wamiliki wa kituo hicho katika kuhakikisha watoto
wanalelewa kwa maadili mema na kulindwa dhidi ya ukatili wa aina yoyote.
“Katika jamii yetu tumekuwa tukishuhudia matukio ya
ukatili yanayowalenga watoto, lakini ukatili huu unatokea ndani ya jamii zetu.
Niwaombe wanajamii wote tushirikiane na kituo hiki kwa kuhamasishana kuleta
watoto hapa. Jukumu la kumlea mtoto ni la jamii nzima, si kwa mzazi peke yake
au mwalimu tu. Serikali inajitahidi, lakini juhudi zake zinahitaji mshikamano
wetu sote. Tukiwalinda watoto, tunalinda taifa na kutengeneza ustawi
stahimikivu kupitia watoto hao,” amesema Kadogosa.
Kadogosa pia amekemea matukio ya utekaji na ulawiti
wa watoto, akihimiza jamii kushirikiana katika kulinda ustawi wa watoto kwa
lengo la kuandaa kizazi bora chenye maadili.
Kwa upande wake, Diwani wa Kata ya Kitangili,
Mhe. Mariam Nyangaka, amepongeza uongozi wa kituo cha
Sunrise Nursery and Day Care kwa juhudi kubwa wanazofanya katika malezi ya
watoto.
“Kwanza niwapongeze viongozi na watumishi wa kituo
hiki kwa kazi kubwa mnayoifanya. Niwaombe muendelee kuweka mazingira wezeshi
zaidi ya kuwalea na kuwatunza watoto wetu. Kituo hiki ni bora sana kwa hapa
Kitangili, na kinatoa mchango mkubwa kwa jamii yetu,” amesema Diwani Nyangaka.
Mkurugenzi wa kituo hicho, Mwalimu Ndaki
Mathias, amewashukuru wazazi na walezi kwa kuendelea kuwaamini na
kuwapeleka watoto wao kituoni hapo.
“Kwanza niwashukuru kwa kuendelea kutuamini na
kuleta watoto hapa kwetu. Ninawahakikishia usalama wa watoto wenu na elimu
bora. Tukishirikiana kwa weledi, hekima, na kwa uwezo wa Mwenyezi Mungu,
tunaweza kufika mbali zaidi. Watoto wanahitaji malezi na matunzo ili waweze
kufanikisha ndoto zao,” amesema Mwalimu Ndaki.
Aidha, wazazi na walezi waliohudhuria mahafali hayo
wameeleza kuridhishwa na huduma zinazotolewa na kituo hicho, wakibainisha kuwa
malezi na elimu inayotolewa inawasaidia watoto kuongeza uwezo wa kufikiri,
kulinda maadili mema, na kuwaandaa vyema kujiunga na shule za msingi.
Kwa mwaka huu wa 2024, jumla ya watoto 78
wamesajiliwa katika kituo hicho, ambapo wanafunzi 24
wamehitimu masomo yao ya awali. Mahafali hayo yamehitimishwa kwa burudani
mbalimbali kutoka kwa watoto, ikiwa ni pamoja na nyimbo, michezo ya kuigiza, na
ngonjera zilizosisitiza umuhimu wa elimu na maadili mema.
Sunrise Nursery and Day Care imeendelea kuwa sehemu muhimu ya kuwajenga watoto kwa misingi ya kiroho, kijamii, na kielimu, ikiwavutia wazazi kutoka maeneo mbalimbali ya Kitangili na nje ya Shinyanga.
Mgeni rasmi katika mahafali ya nne ya kituo cha
watoto Sunrise Nursery and Day Care, Msimamizi wa Utafiti wa
Shirika la Msalaba Mwekundu Tanzania (Monitoring and Evaluation Specialist,
Tanzania Red Cross Society) Simon Maximilian Kadogosa, akizungumza leo Desemba 7,
2024.
Diwani wa Kata ya Kitangili, Mhe. Mariam
Nyangaka, akizungumza kwenye mahafali ya nne ya kituo cha watoto Sunrise
Nursery and Day Care leo Desemba 7, 2024.
