TAASISI YA WANAWAKE NA SAMIA MKOA WA SHINYANGA YATOA ZAWADI ZA MWAKA MPYA 2025 KATIKA KAMBI YA WALEMAVU BUSANDA MISHENI

Na Mapuli Kitina Misalaba

Taasisi ya Wanawake na Samia Mkoa wa Shinyanga imefanya kitendo cha huruma kwa kutoa msaada kwa walemavu na wazee wanaoishi katika kambi ya walemavu ya Busanda Misheni, ikiwa ni sehemu ya kusherehekea Mwaka Mpya 2025 kwa furaha.

Kambi hiyo inahifadhi familia 14 zenye changamoto mbalimbali, ikiwemo walemavu wa viungo, wazee wenye ukoma na wakongwe.

Mwenyekiti wa Taasisi hiyo, Bi. Husna Ally, akizungumza wakati wa kukabidhi msaada huo, amesema kuwa msaada huo umetokana na kuguswa na hali ya watu wa kambi hiyo.

"Sisi Wanawake na Samia Mkoa wa Shinyanga tumeweza kuguswa na hii kambi ya kulelea walemavu wenye ukoma. Tukaona tujichange kidogo tulichobarikiwa na Mungu tuwaletee ili waweze kusherehekea Mwaka Mpya kwa furaha," amesema Bi. Husna.

Msaada uliotolewa unajumuisha: Mfuko mmoja wa sabuni, Mchele kilo 50, Ndoo ya sabuni, Maharage, Juice, Biskuti pamoja na Nguo mbalimbali.

Bi. Husna pia ametoa wito kwa jamii kutoonyesha unyanyapaa kwa watu wanaoishi katika kambi hiyo na kuwashauri watu kujitolea kila inapowezekana.

Makamu Mwenyekiti wa Taasisi hiyo, Bi. Esther Shida, amesisitiza kuwa msaada huo ni sehemu ya kuunga mkono juhudi za Rais Samia Suluhu Hassan.

"Hizi ni kazi ambazo tunamuunga mwanamke mwenzetu ambaye ni jemedari wa Tanzania, Mama Samia. Tunaendelea kuwajibika kama yeye anavyowajibika. Hizi kazi ni mwendelezo; tumekuwa tukisaidia sehemu mbalimbali kwenye Mkoa wetu huu wa Shinyanga," amesema Esther.

Aidha, Bi. Esther ametaja changamoto ya maji safi kama moja ya matatizo makubwa yanayowakabili wakazi wa kambi hiyo ambapo ametoa wito kwa wadau wengine kuungana nao ili kuhakikisha wazee na walemavu hao wanapata maji safi na salama kwa matumizi yao.

Katibu wa Taasisi ya Wanawake na Samia Mkoa wa Shinyanga Bi. Tatu Juma Almas, ameeleza kuwa tukio hilo linaendana na maono ya serikali ya awamu ya sita chini ya Rais Samia Suluhu Hassan.

"Leo Desemba 31, 2024, Wanawake na Samia Mkoa wa Shinyanga tumekuja hapa kwenye kambi ya watu wenye ulemavu iliyopo Parokia ya Busanda. Tumeleta zawadi kwa ajili ya sikukuu ya Mwaka Mpya kwa walemavu na wazee wa kambi hii. Hii yote ni katika kuunga mkono kazi zinazofanywa na serikali ya awamu ya sita chini ya mama yetu Rais Samia Suluhu Hassan," amesema Tatu.

Msimamizi wa kambi hiyo, Kateksta Martin Sheka, ametoa shukrani za dhati kwa msaada huo, akisema kwamba msaada huo utaleta furaha kubwa kwa wakazi wa kambi hiyo.

"Ninawashukuru sana Wanawake na Samia kwa hiki ambacho mmekileta katika kambi hii ya walemavu. Msaada huu tunaupokea kwa shukrani kubwa na Mungu azidi kuwabariki zaidi maana mmetufanya nasi tuweze kufurahia sikukuu ya Mwaka Mpya," amesema Seka.

Sheka pia ameeleza matumaini ya kambi hiyo kupokea msaada zaidi kutoka kwa wadau kwa changamoto ya maji safi, huku akitoa salamu za shukrani kwa Rais Samia Suluhu Hassan kwa juhudi zake za kuwajali wanawake na kuwapa nafasi zaidi za kiuchumi.

Tukio hilo limeonyesha mshikamano wa jamii ya Shinyanga na juhudi za Taasisi ya Wanawake na Samia katika kusaidia makundi yenye uhitaji maalum, huku likihimiza jamii nzima kushiriki katika kuboresha maisha ya watu wanaoishi katika mazingira magumu.

Taasisi ya Wanawake na Samia Mkoa wa Shinyanga wakiwasili katika kambi hiyo ya walemavu Busanda Misheni leo Desemba 31, 2024.

Msaada wa zawadi mbalimbali ambao umetolewa na Taasisi ya Wanawake na Samia Mkoa wa Shinyanga.

Wanawake na Samia Mkoa wa Shinyanga wakitembelea kambi ya wazee.

Wanawake na Samia Mkoa wa Shinyanga wakiendelea kusalimiana na wazee wanaoishi katika kambi hiyo.

Msamamizi wa kambi hiyo, Kateksta Martin Sheka akiwaonyesha Wanawake na Samia Mkoa wa Shinyanga hatua mbalimbali za maendeleo katika kambi hiyo.

Mwenyekiti wa Taasisi ya Wanawake na Samia Mkoa wa Shinyanga Bi. Husna Ally akizungumza wakati wa kukabidhi msaada katika kambi ya walemavu Busanda Misheni leo Desemba 31, 2024.

Makamu Mwenyekiti wa Taasisi hiyo, Bi. Esther Shida akizungumza wakati wa kukabidhi msaada kwenye kambi ya walemavu Busanda Misheni leo Desemba 31, 2024.

Katibu wa Taasisi ya Wanawake na Samia Mkoa wa Shinyanga Bi. Tatu Juma Almas akizungumza wakati wa kukabidhi msaada kwenye kambi ya walemavu Busanda Misheni leo Desemba 31, 2024.