UKARABATI NA UPANUZI WA KIWANJA CHA NDEGE SHINYANGA WAFIKIA ASILIMIA 80, SPC YAIPONGEZA SERIKALI KWA MIRADI YA KIMKAKATI

Na Mapuli Kitina Misalaba

Uwanja wa ndege wa Mkoa wa Shinyanga umefikia takribani asilimia 80 ya utekelezaji wake, ukiwa ni sehemu ya juhudi za serikali kuboresha miundombinu ya usafiri nchini na kwamba Mradi huo wa kimkakati unatarajiwa kukamilika ifikapo Aprili Mwaka 2025.

Hayo yamezungumzwa na Mwakilishi wa wakala wa serikali wa usimamizi wa barabara kuu na barabara za mikoa nchini Tanzania (TANROADS) Mkoa wa Shinyanga Mhandisi Chiyando Matoke, Waandishi wa habari kutoka Mkoa wa Shinyanga kupitia Klabu ya Waandishi wa Habari Mkoa wa Shinyanga (Shinyanga Press Club - SPC), kufanya ziara katika eneo la mradi ili kushuhudia maendeleo ya ujenzi huo.

Matoke amesema ujenzi wa kiwanja hicho ulianza Aprili 2023 na unatarajiwa kugharimu shilingi bilioni 49.18, ukiwa umefikia hatua kubwa, ikiwemo kukamilika kwa barabara ya ndege (runway) yenye urefu wa kilomita 2.2 ambapo amesema kazi zinazobaki ni pamoja na ujenzi wa jengo la abiria na uzio wa kiwanja hicho.

"Nichukue nafasi hii kumshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa jitihada kubwa anazozifanya katika kuboresha miundombinu ya nchi, ikiwemo viwanja vya ndege."

"Eneo la uwanja wa ndege kwa ajili ya kuruka na kutua ndege limekamilika na linaweza kutumika. Uwanja huu una urefu wa kilomita 2.2, huku kila mwisho wa barabara ya ndege kukiwa na kipande cha mita 300 cha hifadhi ya urefu."

"Kwa sasa tunaendelea na ujenzi wa uzio wa uwanja huu, pamoja na kipande cha barabara kinachounganisha barabara kuu na eneo la uwanja wa ndege katika kiwango cha Lam"

"Tunaahidi serikali kwamba, kama tulivyoeleza kwa Naibu Waziri, tutafanya kazi usiku na mchana kuhakikisha uwanja huu unakamilika kwa wakati." amesema Matoke.

Kwa upande wake, Mhandisi Ruburi Kahatano wa Kampuni ya CHICO, ambayo inatekeleza mradi huo, amesema ndege mbili za dharura zimeshatua katika kiwanja hicho, ikiwemo moja iliyombeba mgonjwa kwenda Dar es Salaam kwa matibabu ya dharura.

Mwenyekiti wa Klabu ya Waandishi wa Habari Mkoa wa Shinyanga, Greyson Kakuru, amepongeza serikali kwa juhudi zake za kuboresha miundombinu, akisema kukamilika kwa kiwanja hicho kutaleta fursa za kiuchumi kwa wakazi wa Shinyanga na maeneo jirani.

Ujenzi wa Kiwanja cha Ndege cha Shinyanga unatarajiwa kuchochea maendeleo ya kiuchumi na kijamii kwa kuboresha usafiri wa abiria na mizigo, huku ukiimarisha biashara na uwekezaji katika mkoa huo.

Msimamizi Mwakilishi wa TANROADS Mkoa wa Shinyanga, Mhandisi Chiyando Matoke, akielezea kuhusu hatua iliyofikiwa mradi wa ukarabati na upanuzi wa Kiwanja cha Ndege cha Shinyanga wakati Waandishi wa habari kutoka Mkoa wa Shinyanga walipofanya ziara katika Kiwanja hicho kilichopo Ibadakuli Manispaa ya Shinyanga leo Desemba 23, 2024

Mhandisi wa Ujenzi wa Kiwanja cha Ndege Shinyanga Ruburi Kahatano akielezea kuhusu ujenzi wa mradi wa ukarabati na upanuzi wa Kiwanja cha Ndege cha Shinyanga leo Desemba 23, 2024.

Mhandisi wa Ujenzi wa Kiwanja cha Ndege Shinyanga Ruburi Kahatano akielezea kuhusu ujenzi wa mradi wa ukarabati na upanuzi wa Kiwanja cha Ndege cha Shinyanga

Viongozi mbalimbali wanahusika na ujenzi wa Kiwanja cha Ndege Shinyanga wakiwaongoza waandishi wa habari kutembelea kiwanja cha ndege leo Desemba 23, 2024.