Na Mapuli Kitina Misalaba
Jumuiya ya Wazazi ya Chama cha Mapinduzi (CCM)
Wilaya ya Shinyanga Mjini leo Januari 29, 2025 imeadhimisha miaka 48 ya CCM kwa
kufanya shughuli mbalimbali za kijamii, ikiwemo usafi wa mazingira, uchangiaji
wa damu salama katika Kituo cha Afya Ihapa, na kutoa msaada wa vitu mbalimbali
kwa wahitaji.
Katika maadhimisho hayo, viongozi wa jumuiya hiyo
wakiongozwa na Mwenyekiti Fue Mrindoko, Katibu Bi. Doris Yotham Kibabi, na
Mjumbe wa Kamati ya Utekelezaji Mary Makamba, wametembelea kata kadhaa
kushiriki shughuli hizo.
Viongozi hao wamefika katika Soko la Wajasiriamali
Ibinzamata, ambako wameshirikiana na wanachama wa kata hiyo kufanya usafi na
kuzungumza na wajasiriamali wa soko hilo.
Mwenyekiti wa Jumuiya ya Wazazi CCM Wilaya ya
Shinyanga mjini, Fue Mrindoko, amewasisitiza wafanyabiashara hao kutunza
miundombinu ya soko hilo huku akiipongeza serikali kwa kulijenga, jambo ambalo
limewaondolea usumbufu na kuwaimarisha kiuchumi.
Baadhi ya wajasiriamali wametoa shukrani kwa jumuiya
hiyo kwa kufanya usafi katika eneo hilo na kuwasikiliza changamoto zao ambapo
Mrindoko amemhimiza Mkurugenzi wa Halmashauri ya Manispaa ya Shinyanga
kushughulikia changamoto zilizopo sokoni hapo.
Katibu wa Jumuiya ya Wazazi CCM Wilaya ya Shinyanga
mjini, Bi. Doris Yotham Kibabi, amewapongeza viongozi wa matawi na wanachama
kwa kushiriki katika usafi huo na akawataka kuendelea na juhudi hizo maeneo
mengine kama sehemu ya maadhimisho ya miaka 48 ya CCM huku akisisitiza kuwa
utunzaji wa soko hilo ni jukumu la wajasiliamali wenyewe.
"Soko
hili tumejengewa na Serikali ya Jamhuri ya Muungano wa Tanzania, lakini jukumu
la kulitunza ni letu sote. Tusipolitunza, litaharibika mapema. Napenda
kuipongeza serikali kwa kujenga soko hili la kisasa, kwani awali walikuwa wanafanya
biashara chini ya maturubai," amesema Doris.
Baada ya shughuli za usafi sokoni, viongozi hao wameelekea
katika Kituo cha Afya Ihapa kilichopo Kata ya Old Shinyanga, ambako
wameshirikiana na viongozi wa jumuiya hiyo kufanya usafi wa mazingira na
kuchangia damu salama.
Kwa niaba ya Mganga Mfawidhi wa kituo hicho, Daktari
Joel Kapinga ameishukuru jumuiya hiyo kwa kushiriki katika zoezi la uchangiaji
damu na kufanya usafi ambapo amesema kuwa damu iliyokusanywa itasaidia kuokoa
maisha ya wagonjwa wenye uhitaji.
Mwenyekiti wa Jumuiya ya Wazazi, Fue Mrindoko, amewapongeza
madaktari kwa kazi kubwa wanayoifanya katika kituo cha Afya Ihapa na kwamba amemshukuru
Rais Samia Suluhu Hassan kwa juhudi zake katika kuboresha sekta ya afya, elimu,
na miundombinu.
"Tuna
kila sababu ya kumpongeza Rais wetu, Dkt. Samia Suluhu Hassan, kwa kujenga
shule, hospitali, barabara na madaraja makubwa na madogo kote nchini amefanya
kazi nzuri sana," amesema Mrindoko.
Aidha, amezungumzia maamuzi ya Mkutano Mkuu wa CCM
wa Dodoma, ambapo Rais Samia alipitishwa kuwa mgombea pekee wa chama hicho kwa
nafasi ya urais katika uchaguzi ujao ambapo amesema kuwa Jumuiya ya Wazazi CCM
Wilaya ya Shinyanga mjini imekubali maamuzi hayo na wanaendelea kumuunga mkono.
Katika hotuba yake, Mrindoko ametoa wito kwa wazazi
na walezi kuwa makini katika malezi ya watoto wao na kuhakikisha kuwa
wanawafundisha maadili mema.
Amesisitiza kuwa wale wanaofanya ukatili dhidi ya
watoto, ikiwemo ubakaji na ulawiti, wanapaswa kuchukuliwa hatua kali za
kisheria badala ya kumaliza kesi hizo kifamilia.
"Wazazi
wanapaswa kuwa makini na watoto wao. Vijana wengi wanaharibika kutokana na
kuchezewa na wahuni. Wazazi wanapaswa kuwa mstari wa mbele katika kuhakikisha
watoto wao hawapotei," amesema Mrindoko.
Kwa mujibu wa Katibu wa Jumuiya ya Wazazi CCM Wilaya
ya Shinyanga Mjini, Bi. Doris Yotham Kibabi, maadhimisho hay oleo yamefanyika katika
kata mbalimbali, ikiwa ni pamoja na Ndembezi, Ibinzamata, Old Shinyanga,
Lubaga, Kitangili, Kizumbi, na Ibadakuli ambapo amesema kuwa kata hizo
zimefanya shughuli mbalimbali za kijamii kama vile usafi kwenye shule na
masoko.
Doris ameongeza kuwa maadhimisho ya miaka 48 ya CCM
yatahitimishwa kwa sherehe kubwa inayotarajiwa kufanyika Januari 31, 2025,
katika Kata ya Chibe, Wilaya ya Shinyanga Mjini ambapo amewaomba viongozi,
wanachama, na wananchi kuhudhuria kwa wingi ili kusherehekea mafanikio ya chama
hicho tangu kuanzishwa kwake mwaka 1977.
Mwenyekiti wa Jumuiya ya Wazazi CCM Wilaya ya
Shinyanga mjini, Fue Mrindoko, Katibu wa Jumuiya ya Wazazi CCM Wilaya ya Shinyanga
mjini, Bi. Doris Yotham Kibabi na Mjumbe wa Kamati ya Utekelezaji jumuiya ya
wazazi Bi. Mary Makamba wakishiriki na viongozi wa jumuiya hiyo kata ya
Ibinzamata kufanya usafi wa mazingira katika eneo la soko la wajasiliamali
Ibinzamata ikiwa ni sehemu ya maadhimisho ya Miaka 48 ya CCM.
Katibu wa Jumuiya ya Wazazi CCM Wilaya ya Shinyanga mjini, Bi. Doris Yotham Kibabi akifanya usafi katika eneo la soko la wajasiliamali Ibinzamata ikiwa ni sehemu ya maadhimisho ya Miaka 48 ya CCM.
Viongozi wa jumuiya ya Wazazi CCM wakiendelea na shughuli ya usafi katika kituo cha Afya Ihapa ikiwa ni sehemu ya baadhimisho ya Miaka 48 ya CCM.
Mwenyekiti wa Jumuiya ya Wazazi CCM Wilaya ya
Shinyanga mjini, Fue Mrindoko akipima uzito. 
Mwenyekiti wa Jumuiya ya Wazazi CCM Wilaya ya Shinyanga mjini, Fue Mrindoko akipima uzito. 
Mjumbe wa Kamati ya Utekelezaji jumuiya ya
wazazi Bi. Mary Makamba akipima uzito.
Katibu wa Jumuiya ya Wazazi CCM Wilaya ya Shinyanga mjini, Bi. Doris Yotham Kibabi akichangia damu salama katika kituo cha Afya Ihapa ikiwa ni sehemu ya maadhimisho ya Miaka 48 ya CCM. 
