KATAMBI AWASILISHA TAARIFA YA UTEKELEZAJI WA ILANI YA UCHAGUZI YA CCM 2020/2024, ALLY HAPI ATOA ONYO DHIDI YA RUSHWA KATIKA SIASA

Na Mapuli Kitina Misalaba

Katibu Mkuu wa Jumuiya ya Wazazi CCM Taifa Mhe. Ally Hapi, amempongeza Mbunge wa Jimbo la Shinyanga Mjini, Mhe. Patrobas Katambi, kwa utekelezaji wa Ilani ya Uchaguzi ya CCM kwa vitendo, hali ambayo amesema imejenga imani ya wananchi kwa Chama na kuhakikisha ushindi wa CCM kwenye uchaguzi mkuu.

Hapi amehimiza wabunge na madiwani kuendelea kuchapa kazi na kukamilisha ahadi walizotoa kwa wananchi badala ya kuvunjika moyo na wanaotamani nafasi zao.

Hapi pia amesisitiza udhibiti wa nidhamu kwa wanachama wanaoendesha kampeni kabla ya wakati ambapo ametumia nafasi hiyo kuwatahadharisha wale wanaoanza kutangaza nia mapema dhidi ya kushirikiana na madalali wa kisiasa, akisema, “Watiania jihadharini na wapambe feki; siasa ni kama ulevi, mtauza kila kitu na kubaki weupe.”

Aidha, Hapi amesema uchaguzi huu ni wa kujipanga kwa kila mgombea kubebwa na kazi alizofanya badala ya kupanga safu za wajumbe, akibainisha kuwa Rais Samia Suluhu Hassan ameshatoa mwongozo wa kuhakikisha nidhamu inazingatiwa na kwamba TAKUKURU itasimamia uchaguzi ndani ya Chama ili kuhakikisha haki na maadili yanazingatiwa.

Hapi ametoa wito kwa viongozi wa CCM na wagombea kuhakikisha wanatumia kampeni kueleza mafanikio ya utekelezaji wa Ilani ya Uchaguzi ili kupata ushindi wa kishindo kupitia siasa za kisayansi na hoja madhubuti.

Mbunge wa jimbo la Shinyanga mjini Mhe. Paschal Patrobas Katambi, amesoma taarifa ya utekelezaji wa ilani ya uchaguzi ya CCM 2020/2024, akidai kufanikisha utekelezaji kwa asilimia 100.

Mhe. Katambi, ambaye pia ni Naibu Waziri wa Ofisi ya Waziri Mkuu (Kazi, Vijana, Ajira na Watu Wenye Ulemavu), ameainisha mafanikio katika sekta mbalimbali, zikiwemo elimu, afya, maji, miundombinu, nishati safi ya kupikia, michezo, na ujenzi wa chama.

ELIMU

Amesema katika kipindi chake shule mpya tisa zimejengwa zikiwemo za msingi tano na sekondari nne ambapo pia amefanikisha kuanzishwa kwa tawi la Chuo cha Serikali za Mitaa Hombolo na upanuzi wa Chuo Kikuu cha Moshi (MUCOPS) tawi la Kizumbi.

MIUNDOMBINU

Katika kipindi chake, barabara na madaraja korofi kama Uzogole, Iwelyangula, Kitangili, Ndala, na Mwamalili yameboreshwa ambapo ujenzi wa stendi mpya na ukarabati wa masoko kama Ngokolo Mitumbani, Ibinzamata, na Kambarage umefanikishwa.

AFYA

Katambi amesema amejenga zahanati sita na kuboresha vituo vya afya, kikiwemo Kituo cha Afya Kambarage ambapo zaidi ya ambulansi sita zimepokelewa kwa msaada wa Rais Samia Suluhu Hassan.

MAJI

Amesema jimbo hilo limepokea shilingi bilioni 195 kwa ajili ya usambazaji wa maji katika maeneo mbalimbali, na utekelezaji utaanza mwaka wa fedha 2024/2025.

MICHEZO

Katambi amezindua ligi mbalimbali kwa lengo la kuibua vipaji vya vijana, huku zawadi kwa washindi zikifikia hadi shilingi milioni 6.

UJENZI WA CHAMA

Amesema amejenga ofisi za CCM, ikiwemo ofisi ya Ibadakuli kwa gharama ya milioni 54 na ya Chibe kwa milioni 48.

Mbunge Katambi pamoja na mambo mengine amekabidhi vifaa mbalimbali kwa jamii, ikiwa ni pamoja na kiti mwendo kwa mtoto mwenye ulemavu Delfina Mashaka. Katibu Mkuu Hapi alikabidhi kiti hicho pamoja na spika nne na maikrofoni nne kwa uongozi wa Stendi ya Mabasi ya Mkoani, ikiwa ni sehemu ya utekelezaji wa ahadi za Katambi kwa wananchi.

Katibu wa CCM Mkoa wa Shinyanga, Odilia Batimayo, amempongeza Katambi kwa utekelezaji mzuri wa ilani ya CCM na kuonya wanachama wanaofanya kampeni kabla ya wakati.