SHINYANGA YAADHIMISHA SIKU YA KUZALIWA KWA RAIS SAMIA KWA UPANDAJI MITI RC MACHA ATOA MAELEKEZO KWA HALMASHAURI KUHUSU UTUNZAJI WA MAZINGIRA

Na Mapuli Kitina Misalaba

Mkuu wa Mkoa wa Shinyanga, Mhe. Anamringi Macha, ametoa maelekezo kwa Wakuu wa Wilaya na Halmashauri zote mkoani Shinyanga kuhakikisha wanatekeleza kikamilifu utunzaji wa mazingira na matumizi ya nishati safi.

Akizungumza leo katika zoezi la upandaji miti lililofanyika katika Shule ya Msingi Mapinduzi A na B, Mhe. Macha ameagiza hatua kali zichukuliwe kwa mifugo itakayoruhusiwa kula miti inayopandwa.
"Mifugo yote itakayoonekana inalishwa katika maeneo haya ambayo tumepanda miti hatua kali zichukuliwe, ikiwa ni pamoja na kukamata mifugo hiyo. Pia, maeneo ambayo tumeamua kuotesha miti tuhakikishe kuwa hatua zinachukuliwa za kutunza hiyo miti," amesema Mhe. Macha.

RC Macha amesema Shinyanga ina mpango wa kupanda miti milioni moja na laki tano ambapo amezielekeza Halmashauri zote sita za Mkoa wa Shinyanga kuhakikisha kila mmoja anachukua hatua za kusimamia upandaji na utunzaji wa miti.
"Mpango huu ni lazima tuufanikishe. Natoa rai kwa Halmashauri zote sita za Mkoa wa Shinyanga kuhakikisha kila mmoja anachukua hatua za kusimamia upandaji na utunzaji wa miti," amesema RC Macha

Kwa upande wake, Mkuu wa Wilaya ya Shinyanga, Wakili Julius Mtatiro, ameahidi kutekeleza maelekezo hayo kwa vitendo.
"Maelekezo ambayo Mkuu wa Mkoa umetupatia ya kuendeleza kampeni ya upandaji miti, sisi Wakuu wa Wilaya tutayasimamia kwa umakini ili kuhakikisha tunaboresha mazingira ya Shinyanga," amesema Mtatiro.

Mstahiki Meya wa Manispaa ya Shinyanga, Mhe. Elias Ramadhan Masumbuko, naye ameahidi kuhakikisha miti iliyopandwa inatunzwa vizuri.
"Tutaendelea kuzingatia maelekezo ya Mkuu wa Mkoa kuhakikisha miti hii inastawi vizuri na kufanikisha lengo la kuboresha mazingira," alisema Masumbuko.

Zoezi hilo limefanyika kama sehemu ya kumbukizi ya kuzaliwa kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan, aliyezaliwa Januari 27, 1960 huku viongozi na wananchi Mkoani Shinyanga wakitumia nafasi hiyo kumpongeza Rais Samia kwa mchango wake mkubwa katika maendeleo ya nchi.

Mkuu wa Mkoa wa Shinyanga, Mhe. Anamringi Macha akipanda mti ikiwa ni sehemu ya kumbukizi ya kuzaliwa kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Mkuu wa Wilaya ya Shinyanga, Wakili Julius Mtatiro akipanda mti ikiwa ni sehemu ya kumbukizi ya kuzaliwa kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Mkuu wa Mkoa wa Shinyanga Mhe. Anamringi Macha akipokea zawadi;

Mkuu wa Mkoa wa Shinyanga, Mhe. Anamringi Macha akitoa maelekezo baada ya zoezi la upandaji miti leo Januari 27, 2025 katika shule ya msingi Mapinduzi A na B zilizopo kata ya Ngokolo Manispaa ya Shinyanga.