Mwenyekiti wa Chama Cha Mapinduzi (CCM) Wilaya ya Shinyanga Mjini, Mhe. Anord Makombe akizungumza.
Na Mwandishi wetu, Misalaba Media
Mwenyekiti wa Chama Cha Mapinduzi (CCM) Wilaya ya
Shinyanga Mjini, Mhe. Anord Makombe, ameongoza uzinduzi wa Kituo cha Maafisa
Usafirishaji (Bodaboda) Majengo Mapya, huku akisisitiza umuhimu wa vijana
katika maendeleo ya jamii na fursa zinazotolewa na serikali kwa sekta ya
usafirishaji.
Shamrashamra za Uzinduzi
Hafla hii ilianza kwa maandamano ya bodaboda, ambapo
mamia ya waendesha pikipiki walimlaki mgeni rasmi kutoka ofisi za CCM Wilaya
hadi kituo chao. Baada ya kuwasili, Mwenyekiti Makombe alikata utepe kuashiria
uzinduzi rasmi wa kituo hicho, tukio lililoshuhudiwa na viongozi wa chama,
wanachama wa bodaboda, na wananchi waliojitokeza kwa wingi.
Taarifa ya Mafanikio na Changamoto
Baada ya uzinduzi, Afisa Usafirishaji Elius Shija
Kamuga alisoma risala kwa mgeni rasmi, akielezea historia na maendeleo ya kituo
hicho. Alifafanua kuwa kituo hicho kilianza miaka mitano iliyopita kikiwa na
wanachama saba pekee, lakini kwa sasa kina wanachama 45. Mafanikio
yaliyopatikana ni pamoja na:
Usajili
wa kituo rasmi cha bodaboda.
Ujenzi
wa banda la kujikinga na jua.
Ufunguzi
wa akaunti ya benki katika CRDB kwa usalama wa fedha zao.
Uwezeshaji
wa vijana kusomea mafunzo ya usafirishaji katika VETA.
Hata hivyo, alieleza changamoto ya ukosefu wa fedha
za kuwapeleka vijana wengi zaidi katika mafunzo na kuomba serikali kupitia CCM
kusaidia upatikanaji wa mikopo ya pikipiki kwa wanachama wa kituo hicho.
Ahadi ya CCM kwa Vijana
Akizungumza baada ya kupokea risala, Mwenyekiti wa
CCM Wilaya ya Shinyanga Mjini, Ndugu Anord Makombe, aliwapongeza vijana wa
bodaboda kwa mshikamano wao na juhudi za kuboresha maisha yao. Aliahidi kwamba
chama na serikali vitahakikisha wanapata mikopo ya pikipiki, huku pia wakipewa
mafunzo maalum ili kuongeza usalama wa barabarani.
Aliwahimiza vijana kuzingatia maadili, akiwakumbusha
kuwa usafirishaji wa bodaboda ni kazi muhimu kwa jamii na lazima ifanywe kwa
uadilifu. "Mnatakiwa kuwa mfano wa kuigwa, msiharibu ndoa za watu wala
kudanganya watoto wa shule kwa chips mayai. Tunataka kuona vijana wenye maadili
mema," alisisitiza.
Aidha, alihimiza vijana kutumia fursa za mafunzo
zinazotolewa na serikali, akibainisha kuwa Ofisi ya Waziri Mkuu inatoa nafasi
za bure kwa vijana kusomea katika vyuo maalum kama Bugweto, ambapo gharama zote
zinagharamiwa na serikali.
CCM na Uchaguzi Mkuu Ujao
Mwenyekiti Makombe pia alitumia fursa hiyo kuwakumbusha
vijana kuwa mwaka huu ni mwaka wa uchaguzi, na kuwaomba waendelee kuiunga mkono
CCM kwa maendeleo endelevu. Alisisitiza kuwa Rais Samia Suluhu Hassan amefanya
kazi kubwa ya kuwaletea maendeleo wananchi, hivyo ni muhimu kumpa nafasi
nyingine ili kuendeleza juhudi zake.
Hitimisho
Mwenyekiti wa Chama Cha Mapinduzi (CCM) Wilaya
ya Shinyanga Mjini, Mhe. Anord Makombe akizungumza.
