TK MOVEMENT YAZINDUA WIKI YA VIJANA NA WANAWAKE SHINYANGA MJINI, YAKABIDHI MSAADA KWA SHULE

Uzoefu na Ubunifu: &nbsp;Timu yetu ya wataalamu ina uzoefu wa miaka mingi katika sekta ya habari na uchapishaji wa maudhui.
Ubora na Uaminifu: &nbsp;Tunajivunia kutoa huduma bora na za kuaminika kwa wateja wetu.
Upatikanaji: &nbsp;Tupo mtandaoni muda wote, tukihakikisha unapata taarifa muhimu kwa wakati.

Na Mapuli Kitina Misalaba

Taasisi ya TK Movement Wilaya ya Shinyanga Mjini imezindua rasmi Wiki ya Vijana na Wanawake kwa kukabidhi msaada wa mashine ya kunakili (photocopy) kwa Shule ya Msingi Mwamagunguli A, iliyopo Kata ya Kolandoto, Manispaa ya Shinyanga.

Akizungumza wakati wa hafla hiyo, Mratibu wa TK Movement Wilaya ya Shinyanga Mjini, Moses Mshagatila, amesema shughuli hiyo ni sehemu ya ratiba ya wiki hiyo, ambayo inalenga kuunga mkono juhudi za serikali katika kuboresha sekta ya elimu.

"Tunatarajia kufanya kongamano la vijana na wanawake, ambalo limeratibiwa na TK Movement Wilaya ya Shinyanga Mjini. Leo tarehe 2 tumefungua wiki hii kwa kukabidhi msaada huu wa mashine ya kunakili. Kesho, Alhamisi, tutakuwa na zoezi la kuchangia damu salama, Ijumaa tutatembelea vituo vya kulelea watoto yatima na watoto wenye uhitaji, na kilele cha Wiki ya Vijana na Wanawake kitakuwa Jumamosi tarehe 5 Aprili 2025, kwenye ukumbi wa Chuo cha Walimu SHYCOM. Tunatarajia mgeni rasmi awe Naibu Waziri wa Ofisi ya Waziri Mkuu anayeshughulikia Kazi, Vijana, Ajira na Wenye Ulemavu, ambaye pia ni Mbunge wa Jimbo la Shinyanga Mjini, Mhe. Paschal Patrobas Katambi," amesema Mshagatila.

Baadhi ya walimu na wanafunzi wa Shule ya Msingi Mwamagunguli A wameishukuru TK Movement kwa msaada huo, wakieleza kuwa utarahisisha upatikanaji wa nyaraka muhimu za kitaaluma na kuboresha mazingira ya kujifunzia.

Mashine hiyo ina thamani ya zaidi ya shilingi milioni mbili.